अथक

अथक ही पुनर्वसन केंद्रातील दिव्यांग जवानांच्या सत्यकथांवर आधारित काल्पनिक कादंबरी आहे. कर्नल मुखर्जी हे या पुनर्वसन केंद्राचे प्रमुख आहेत. अपघातांमुळे शारीरिक मर्यादा निर्माण झालेल्या जवानांचे आयुष्य पुन्हा उभे करण्यासाठी सुरू असलेला संघर्ष आणि त्यांची जिद्द या कादंबरीतून समोर येते.

नायक सुरेश कार्की यांचा एका अपघातात छातीपासून खालच्या शरीरावरील स्नायूंवरील ताबा सुटला. त्यांना पुण्यातील खडकी येथील पुनर्वसन केंद्रात दाखल करण्यात आले. मात्र, आपल्या जिद्द आणि अथक प्रयत्नांच्या बळावर त्यांनी बॅडमिंटनमध्ये प्रावीण्य मिळवले आणि जागतिक क्रमवारीत स्थान प्राप्त केले.

मृदुल घोष हे विमानाच्या देखभालीचे काम करणारे तंत्रज्ञ होते. एका अपघातात त्यांच्या मानेपासून खालच्या संपूर्ण शरीरावरील स्नायूंवरील नियंत्रण गेले. तरीही त्यांनी हार मानली नाही. तोंडात कुंचला धरून ते उत्कृष्ट चित्रे काढू लागले.

अशाच जिद्दी आणि धैर्यवान जवानांच्या आणखी काही प्रेरणादायी कथा या कादंबरीत समाविष्ट आहेत. या शूर जवानांपासून प्रेरणा घेऊन शेफाली आणि क्षितिज हे दिव्यांग युवकांसाठी कन्नू मेहता केंद्राची स्थापना करतात. त्यांच्या प्रेरणादायी प्रवासातून ही कादंबरी मानवी जिद्द, संघर्ष, आत्मविश्वास आणि प्रतिकूल परिस्थितीवर मात करण्याची अदम्य इच्छाशक्ती यांचे दर्शन घडवते.