Nirantar

प्रार्थना

जिभेने अडखळू नये तिळमात्र चांगल्याला चांगले म्हणताना

हाताने घेऊ नये आखडते तसूभरही सत्कार्यासाठी देताना मदतीचा हात.

पावलांनी थकू नये क्षणभरही भटकताना माझा सुंदर देश

डोळे भरून यावेत आनंदात पाहताना वाचताना ऐकताना चांगले.

भरून यावा ऊर घर होताना घरासारखे कुटुंब कुटुंबासारखे काळजाने जावे हेलावून मित्र होताना भावासारखे सहोदर.

आणि अवघे अंतराळ येताना आपल्या कवेत. आपण व्हावे आपसूक लहानाहून लहान विनासायास.