पत्रकारिता : रूप आणि स्वरूप

महाराष्ट्रातील एक तरूण पत्रकार व प्रशिक्षित पत्रविद्या गुणवंत कवयित्री निशिगंधा व्यवहारे यांनी सोप्या व सुलभ भाषेत समकालीन पत्रकारितेचे व्यामिश्र, विविधांगी स्वरूप आणि कार्य सांगणारे, विद्यार्थ्यांना उपयुक्त ठरणारे 'पत्रकारिता: स्वरूप आणि कार्य' हे पुस्तक सिद्ध केले आहे. डॉ. बाबासाहेब आंबेडकर मराठवाडा विद्यापीठाची प्रतिभावान विद्यार्थीनी असणाऱ्या निशिगंधा व्यवहारे यांनी दर्जेदार पुस्तक लेखन केले आहे. मराठवाड्यातील मोजक्याच महिला पत्रकारिता क्षेत्रात आपले पाय खंबीरपणे रोवून उभ्या आहेत. त्यातील एक नवपत्रकार म्हणजे निशिगंधा व्यवहारे होय. वाङ्‌मयीन व साहित्यिक पत्रकारिता, सांस्कृतिक पत्रकारिता या क्षेत्रात त्यांनी काम करून औरंगाबाद व पुणे येथे अनुभवही घेतला आहे. पुण्यात आवश्यक प्रशिक्षण घेतल्याने त्या इलेक्ट्रॉनिक माध्यमात आपला उत्तम जम बसवतील याची खात्री आहे. - डॉ. सुधीर गव्हाणे