साहित्यविविधा

मराठी साहित्याची परंपरा ही अतिशय बहुरंगी, समृद्ध आणि सतत विकसित होत राहिलेली आहे. संतवाङ्मयापासून ते आधुनिक दलित साहित्यापर्यंत, ग्रामीण कथालेखनापासून ते जागतिक अनुभव नोंदविणाऱ्या प्रवासवर्णनापर्यंत, स्त्री साहित्यापासून ते प्रयोगशील नाटकांपर्यंत असा विस्तृत पट यात दिसतो. मराठी वाङ्मय केवळ करमणूक घडवणारे साधन राहिले नाही, तर ते समाजमन घडवणारे, सत्याची चिकित्सा करणारे आणि संवेदनांना दिशा देणारे एक सशक्त माध्यम ठरले आहे. या परंपरेतील निवडक कलाकृतींवर अभ्यासपूर्ण लेख एकत्र आणण्याचा प्रयत्न 'साहित्यविविधा' या संपादित ग्रंथातून करण्यात आला आहे. कथा, कादंबरी, चरित्र, आत्मचरित्र, आत्मकथन, बखरी, नाटके, प्रवासवर्णन, रिपोर्ताज अशा विविध प्रकारांतील एकूण १५ महत्त्वपूर्ण साहित्यकृती या ग्रंथात अभ्यासल्या आहेत. या ग्रंथामुळे वाचकाला मराठी साहित्याच्या वैविध्यपूर्ण प्रवाहांची आणि त्यातील ठळक प्रेरणा व प्रवृत्तींची ओळख होईल.