गाव विकणे आहे

आजचं आपल्या देशाचं वर्तमान धगधगतं आहे कारण एका बाजूला मूठभरांची अफाट श्रीमंती व विकृतीच्या टोकापर्यंतचा भोगवाद तर दुसऱ्या बाजूला मोठ्या जनसमूहाची भूक, गरिबी आणि बेकारी. देशाने स्वीकारलेल्या कुरुप बाजारप्रणीत विकासनीतीमुळे इथला तरुण अस्वस्थ आहे, शेतकरी आत्महत्या करत आहेत आणि स्त्रीचं विक्रय होणारं वस्तुकरण झालं आहे. या अशा आजच्या विपरीत वर्तमानाचा एक्सरे रिपोर्ट लक्ष्मीकांत देशमुखांनी 'गाव विकणे आहे' या संग्रहातील कथांमधून वाचकांपुढे निर्दय सहानुभूतीने प्रस्तुत केला आहे. दुष्काळामुळे सबंध गाव विकण्यामागची मजबुरी, नक्सली जीवनाचे अंतरंग, गाव-शिवाराला आलेली अवकळा आणि असंवेदनशील प्रशासन यांमुळे सामान्य माणसाचे असह्य झालेले जगणे या साऱ्यांचा लक्ष्मीकांत देशमुखांनी भेदकपणे या सर्वच कथांमधून वेध घेतला आहे. जागतिकीकरणाचे भलेबुरे परिणाम मानवी संवादशीलतेने समजून जर घ्यायचे असतील तर हा कथासंग्रह वाचला पाहिजे. साहित्यलेखन प्रवासाच्या प्रत्येक टप्प्यावर देशमुखांची लेखणी वर्तमानाशी नाते जोडत 'नाहींरे' वर्गाच्या दुःख-वेदनेचा स्वर कशी बनते याचा अनुभव या कथा देतात आणि मानवमुक्तीचा उद्घोष करीत संघर्ष करीत जगणाऱ्या सामान्य माणसाला बळ देतात.